Беларускі нацыянальны павільён на "ЭКСПА-2017" у Астане

Сусветная выстаўка "ЭКСПА-2017", якая працуе з 9 чэрвеня да 10 верасня, сабрала ў сталіцы Казахстана прадстаўнікоў звыш 110 дзяржаў свету. Урачыстую цырымонію адкрыцця наведаў і Прэзідэнт Беларусі Аляксандр Лукашэнка. У дзень старту планетарнага экспафоруму кіраўнікі дзяржаў і ўрада, якія прыбылі ў Астану, сустрэліся з Прэзідэнтам Казахстана Нурсултанам Назарбаевым, азнаёміліся з нацыянальным павільёнам краіны-гаспадыні, а таксама экспазіцыяй, прысвечанай галоўнай тэме сёлетняй выстаўкі - "Энергія будучага".

І ўжо 10 чэрвеня на "ЭКСПА-2017" пачаў прымаць гасцей беларускі павільён. Як адзначылі куратары, у гэтым годзе нацыянальная экспазіцыя Беларусі максімальна інтэрактыўная і, вядома, сугучная Году навукі. Наведвальнікаў сустракаюць хлебам-соллю і знакамітай "Лявоніхай", запрашаючы ўбачыць больш як паўсотні высокатэхналагічных навуковых распрацовак. Сярод іх – экалагічны электробус, святлодыёдныя ўстаноўкі, медыцынскі лазер, прагрэсіўныя касмічныя тэхналогіі. У цэнтры – прэзентацыя індустрыяльнага парка "Вялікі камень", дзе прадстаўлены магчымасці для патэнцыяльных інвестараў. Галоўныя акцэнты – энергія працавітага народа, сучасныя тэхналогіі і, бадай, адно з галоўных багаццяў Беларусі – маляўнічая прырода. Дапаўняе экспазіцыю выстава "Ад Лісабона праз Мінск, Маскву, Астану да Уладзівастока", дзе прадстаўлены работы сучасных мастакоў з 25 краін.

Адным з першых ганаровым госцем павільёна стаў прэм'ер-міністр Пакістана Наваз Шарыф, які зацікавіўся сувенірамі і каларытнымі вышыванкамі. Плануецца, што Дзень Беларусі на "ЭКСПА-2017" адбудзецца 13 жніўня, а пакуль наведвальнікі форуму могуць зрабіць інтэрактыўнае падарожжа па экспазіцыі, дзе прадстаўлены навуковы патэнцыял сучаснай Беларусі, больш таго – атрымаць інфармацыю аб кожным з прадстаўленых праектаў. "Тут і цяпер" арганізатары прапануюць паглядзець падрабязнасці на інтэрактыўных дысплеях, спампаваць на мабільнае ўстройства або адправіць на свой электронны адрас.