Галоўныя навіны

У вызначэнні лепшай спартсменкі года прынялі ўдзел журналісты, члены АІПС, з 91 краіны, уключаючы Беларусь. Па выніках галасавання Серэна Уільямс, якая стала пераможцай сямі турніраў у 2014 годзе, уключаючы турнір "Вялікага шлема" US Open у жаночым адзіночным разрадзе, атрымала 843 галасы (21,43 працэнта). У падтрымку Дар'і Домрачавай выказаліся 483 (12,28 працэнта) прадстаўнікі СМІ. Трэцяе месца заняла нарвежская лыжніца Марыт Б'ёрген - 473 (12,03 працэнта).

Акрамя лепшай спартсменкі члены АІПС вызначылі лаўрэатаў сярод спартсменаў і каманд. У мужчын перамог галкіпер футбольнай зборнай Германіі Мануэль Ноер - 601 (14,84 працэнта). На другім месцы швейцарскі тэнісіст Роджэр Федэрэр - 537 (13,26 працэнта), на трэцім - партугальскі футбаліст Крыштыяну Раналду - 518 (12,79 працэнта).

Сярод спартыўных каманд па-за канкурэнцыяй нацыянальная зборная Германіі па футболе, якая выйграла чэмпіянат свету-2014 - 1 562 (39,36 працэнта). Кампанію ў тройцы ёй склалі дзеючы пераможца футбольнай Лігі чэмпіёнаў УЕФА і трыумфатар нядаўняга клубнага чэмпіянату свету іспанскі "Рэал" (Мадрыд) - 489 (12,55 працэнта), а таксама нацыянальная каманда Швейцарыі па тэнісе - 310 (7,81 працэнта), якая завалодала Кубкам Дэвіса.

На думку членаў АІПС, лепшыя прэс-аб'екты ў гэтым годзе былі абсталяваны арганізатарамі чэмпіянату свету па футболе ў Бразіліі. На другое месца журналісты паставілі профільныя рабочыя месцы зімовай Алімпіяды ў расійскім горадзе Сочы, на трэцяе - адкрытага чэмпіянату Вялікабрытаніі па тэнісе ва Уімблдоне.

АІПС праводзіць галасаванне па вызначэнні лепшых спартсменаў і каманд традыцыйна ў канцы года.