Галоўныя навіны
Новы лагатып ЕАК прадстаўлены ў Мінску
21 кастрычніка, Мінск /Кар. БЕЛТА/. Новы лагатып Еўрапейскіх алімпійскіх камітэтаў (ЕАК) прадстаўлены ў Мінску ў час урачыстага прыёму ў атэлі "Марыёт", паведамляе карэспандэнт БЕЛТА.
Прадстаўнікі кожнай з 50 дэлегацый, якія прыбылі на 45-ю Генеральную асамблею ЕАК, атрымалі канверты з фрагментамі новага лагатыпа арганізацыі. У час прыёму часткі эмблемы былі прымацаваны на магнітную дошку, утварыўшы цэласны відарыс.
"Пры рабоце над новым лагатыпам мелі на мэце не проста змяніць эмблему, а прадставіць у новым лагатыпе новы погляд на развіццё алімпійскага руху з боку ЕАК", - адзначыў генеральны сакратар арганізацыі Рафаэле Паньёцы.
Генеральная асамблея Еўрапейскіх алімпійскіх камітэтаў пройдзе ў Мінску з 20 па 22 кастрычніка. У першы дзень адбылося пасяджэнне Выканаўчага камітэта ЕАК і прэзентацыя новага лагатыпа асацыяцыі. Асноўныя мерапрыемствы пройдуць у штаб-кватэры НАК Беларусі ў Зале алімпійскай славы 21-22 кастрычніка. Сёння ў Нацыянальным акадэмічным Вялікім тэатры оперы і балета адбудзецца ўрачысты вечар, прысвечаны 25-годдзю з моманту заснавання Нацыянальнага алімпійскага камітэта Беларусі. На мерапрыемства будуць запрошаны чэмпіёны і прызёры Алімпійскіх гульняў, трэнеры і спецыялісты, знакамітыя спартсмены, дэлегаты і госці Генасамблеі.
Для асвятлення работы 45-й Генеральнай асамблеі ЕАК акрэдытавана больш за 80 беларускіх і 20 замежных прадстаўнікоў СМІ, якія ў ліку іншых прадстаўляюць інфармацыйныя агенцтвы "Асашыэйтэд Прэс", "Рэйтэр", МІА "Расія сёння", нямецкі тэлеканал WDR. Лагатыпам 45-й Генасамблеі ЕАК у Мінску з'яўляецца стылізаваны пад інкрустацыю саломкай беларускі васілёк.
У мінулым годзе падвядзенне вынікаў Еўрапейскай асацыяцыі ЕАК адбылося ў Празе.
версія для друку
зрабіць стартавай
дабавіць у выбранае