Галоўныя навіны

Лукашэнка: АДКБ застаецца неад'емным элементам бяспекі Еўразійскага рэгіёна

23 лістапада, Мінск /Кар. БЕЛТА/. АДКБ застаецца неад'емным элементам забеспячэння бяспекі Еўразійскага рэгіёна. Аб гэтым Прэзідэнт Беларусі Аляксандр Лукашэнка заявіў на адкрыцці сесіі Савета калектыўнай бяспекі АДКБ у Мінску, перадае карэспандэнт БЕЛТА.

Цяперашняе пасяджэнне Савета калектыўнай бяспекі АДКБ фактычна завяршае беларускае старшынства ў арганізацыі. Фармальна Беларусь перадасць функцыі старшыні казахстанскім сябрам 31 снежня 2023 года.

"Імклівым у плане развіцця геапалітычнай абстаноўкі быў год. Адпаведна, і графік нашай работы быў напружаным. Пачынаючы з вясны Беларусь практычна штомесяц прымала мерапрыемствы па лініі АДКБ: Савет Парламенцкай Асамблеі, затым міжсесіённыя пасяджэнні статутных органаў на міністэрскім узроўні, каардынацыйныя сустрэчы кіраўніцтва профільных дзяржаўных органаў дзяржаў - членаў АДКБ па процідзеянні транснацыянальным пагрозам, такім як наркатрафік, нелегальная міграцыя, надзвычайныя сітуацыі, выклікі ў сферы біялагічнай бяспекі, кібербяспекі", - адзначыў Аляксандр Лукашэнка.

Краіны АДКБ правялі комплекс вучэнняў па ўмацаванні ваеннага складніка арганізацыі. У кастрычніку Мінск стаў пляцоўкай для буйной міжнароднай канферэнцыі па еўразійскай бяспецы, якая прайшла пад эгідай беларускага старшынства ў АДКБ.

"Іншымі словамі, наша арганізацыя застаецца неад'емным элементам забеспячэння бяспекі яе дзяржаў-членаў і Еўразійскага рэгіёна ў цэлым", - заявіў Прэзідэнт.

У лістападзе мінулага года ў час сесіі Савета калектыўнай бяспекі ў Ерэване Аляксандр Лукашэнка агучыў прыярытэтныя напрамкі старшынства Беларусі як на ўнутраным, так і на знешнім контурах.

"На ўнутраным контуры мы імкнуліся павысіць з'яднанасць дзяржаў - членаў АДКБ у мэтах умацавання самой арганізацыі, а таксама забеспячэння бяспекі і стабільнасці ў зоне адказнасці. На знешнім контуры нашай мэтай было ўзмацненне ролі і значнасці арганізацыі ў сістэме міжнародных адносін. Сёння можна канстатаваць, што мэты, намечаныя беларускім бокам у лістападзе мінулага года, у цэлым дасягнуты", - сказаў кіраўнік дзяржавы.

Паводле яго слоў, частка мерапрыемстваў ужо выканана, рэалізацыя некаторых задач прадаўжаецца, а асобныя прыярытэтныя напрамкі маюць доўгатэрміновы характар і ўзяты ў прапрацоўку як дзяржавамі-членамі, так і Сакратарыятам АДКБ.

"Безумоўна, вынікі работы - гэта калектыўны поспех, заслуга ўсіх нас - удзельнікаў дагавора. Мы не змаглі б рэалізаваць задуманае без падтрымкі прыярытэтаў беларускага старшынства з боку сяброў і партнёраў", - падкрэсліў Прэзідэнт.

версія для друку

зрабіць стартавай

дабавіць у выбранае