Галоўныя навіны

У апошнім жаночым мас-старце на 12,5 км з чатырма агнявымі рубяжамі першая да фінішу прыйшла прадстаўніца Славакіі Настасся Кузьміна, якая паказала рэзультат 39 мін. 44,8 сек. Пры 4 промахах на стрэльбішчы. Другое месца заняла славенка Тэя Грэгарын, якая ўступіла пераможцы 3,8 сек. (2 промахі), а трэцяй фінішавала францужанка Мары Дарэн-Эбер (8,3 сек.; 3). Лідар беларускай зборнай трохразовая алімпійская чэмпіёнка Дар'я Домрачава завяршыла мас-старт чацвёртай (+9,6 сек.; 4) і стала лепшай у гэтай дысцыпліне па выніках кубкавага сезона, стаўшы ўладальніцай малога Хрустальнага глобуса.

У агульным заліку Кубка свету гэтага сезона першынствавала фінская спартсменка Кайса Мякярайнен (860 ачкоў), якая стала ўладальніцай вялікага Хрустальнага глобуса, другое месца ў нарвежкі Туры Бергер (856), а Дар'я Домрачава замкнула тройку фаварытаў кубкавага заліку, набраўшы па выніках сезона 793 балы.

Завершаць біятлонны сезон мужчыны, якім трэба будзе прайсці дыстанцыю з масавага старту працягласцю 15 км з чатырма агнявымі рубяжамі. Беларускіх прадстаўнікоў у ёй не будзе. Незалежна ад вынікаў заключнай гонкі пераможцам у агульным заліку Кубка свету датэрмінова стаў французскі біятланіст Мартэн Фуркад (868), а следам за ім размясціліся два нарвежскія страляючыя лыжнікі Іаханэс-Цінэс Бо (612) і Эміл-Хегле Свендсэн (609).